دكتۆر دواڕۆژ 20/11/2019
gynecomastia m واتە گەورەبوونی شانەكانی مەمك لە رەگەزی نێردا. دەكرێت یەك مەمك یان هەردوو مەمكەكە بگرێتەوە. لە زوربەی زۆری حاڵەتەكاندا ئەمە دەرئەنجامی تێكچوونی هاوسەنگییە لەنێوان هۆڕمۆنەكانی ئیسترۆجین و تێستۆستیرۆندا، واتە هۆڕمۆنەكانی خەسڵەتە مێینەكان و هۆڕمۆنی خەسڵەتەكانی نێرینە. زۆرجار ئەو تێكچوونی هاوسەنگییە لەدوای تەمەنی 50 ساڵییەوە لە زوربەی پیاواندا دەردەكەوێت بەڵام بۆ تەمەنی بەڕێزت نائاساییە. دیارە هەندێك هۆكاری دیكە هەن وەك نەخۆشییەكانی جگەر و گورچیلە و رژێنی دەرەقیی و هەبوونی گرێ لە رژێنی ئەدریناڵ و هێلكەكانی گوندا. كۆمەڵێك دەرمانیش زۆر بەكارهێنانیان هەمان كاریگەریی دروست دەكەن، بۆ نموونە حەبی فلاجیل، ستیرۆیدەكان، دەرمانی پڕۆستات، تەگامێت و هەندێك دەرمانی دیكە. پێویستە لەڕێی پشكنینی پزیشكی و ئەنجامدانی هەندێك پشكنینی تاقیگەییەوە حاڵەتەكە دەستنیشان بكرێت.
بەشێوەیەكی گشتی ئەم حاڵەتە پێویستی بە چارەسەركردن نییە. بەشێكی زۆریان بە تێپەڕبوونی كات بچوك دەبنەوە. ئەگەر هۆكارەكە یەكێك لەو نەخۆشیانە بێت كە باسمان كرد پێویستە نەخۆشییەكە چارەسەر بكرێت. ئەگەر هۆكارەكە بەكارهێنانی دەرمانێكە لەو دەرمانانە پێویستە پزیشكەكەت بۆت بگۆڕێت. نەشتەرگەریی تەنیا كاتێك پێویستە كە ئەو گەورەبوونە ببێتە مایەی ئازارێكی زۆر یان تەواو بێزاری كردبیت.سوپاس بۆ بەكارهێنانی دكتۆر دواڕۆژ.