دكتۆر دواڕۆژ 24/4/2019
دیارە چەند جۆرێك ڤایرۆسی جگەر هەیە كە دەبنە هۆی هەوكردنی جگەر، جۆرەكانیشی بریتین لە A و B و C و D و E جۆری A و E لە رێی خواردنی ئالودەبووەوە بڵاودەبێتەوە، كە ئەو خواردنە پیسایی نەخۆشێكی ئەو ڤایرۆسەی بەركەوتبێت. ئەم جۆرە هەوكردنە ماوەیەكی كورت دەخایەنێت و دواتر جەستە ئەتوانێت خۆی لە ڤایرۆسەكە رزگار بكات.
بەڵام جۆرەكانی B و C و D لە رێگەی خوێنی كەسێكی نەخۆشەوە بڵاودەبێتەوە، هەروەها لەڕێی بەركەوتنی شلەمەنییەكانی تری كەسێكی نەخۆش واتە لەڕێی بەكارهێنانی سرنجی ئالوودەبوو یان لەڕێی كرداری سێكسەوە ئەگەر هاوبەشەكە ئەو ڤایرۆسەی هەڵگرتبێت. كێشەی هەوكردنی جگەر بەم سێ ڤایرۆسە ئەوەیە كە دەبێتە نەخۆشییەكی درێژخایەن و رەنگە زیانی گەورە بە جگەر بگەیەنێت لە كۆتاییدا، وەك مۆمیابوونی جگەر یان تەنانەت شێرپەنجەی جگەریش.
تووشبوون بە ڤایرۆسی A دەبێتە هۆی دەركەوتنی چەند نیشانەیەكی ئاسان و سەرئەنجام نەخۆشەكە بەتەواوەتی چاك ئەبێتەوە و بەرهەڵستی پەیدا ئەكات بەرامبەر بەو نەخۆشییە و ئەمە لای خۆمان بە زەردویی ناسراوە كە هەندێك جار بە دەگمەن نەخۆشەكە لێی پیس دەكات و رەنگە ژیانیشی بخاتە مەترسییەوە.
جۆری B وەك وتمان لەرێگەی سێكس و دەرزی ئالوودەبوو یان تاتۆكردن یان هەندێك جار كەرەستەی سەرتاشخانە دەگوێزرێنەوە. خۆشبەختانە ئەم جۆرە ڤایرۆسە ڤاكسینی هەیە كە بە رێژەی 95% كاریگەرە.
چارەسەری هەوكردنی جگەری ڤایرۆسی:
هەندێك جۆری ئەو هەوكردنە بەتایبەت حاڵەتە سووكەكانی خۆی چاك دەبێتەوە. بەگشتیش چارەسەرێكی دیاریكراو نییە.
لە جۆری ڤایرۆسی Aدا پارێز و ئیسراحەت و دووركەوتنەوە لە خواردنەوە كحولییەكان و دەرمان بەسن بۆ پاراستنی جگەر كە زوربەیان چاك دەبنەوە.
جۆری B و C بێجگە لەو رێكارانەی سەرەوە دەرمانێكی دژەڤایرۆسیش دەدرێتە بە نەخۆشەكە كە پێی دەوترێت ئینتەرفیرۆن.
نیشانەكانی تووشبوونیش بە ڤایرۆسی جگەر سەرەتا وەكو ئینفلۆنزا وایە بە تا و ئازاری لەش و نەمانی ئارەزووی خۆراك دەستپێدەكات و دواتر زەردویی دەردەكەوێت لە نەخۆشەكەدا.